Senin, 30 April 2012

Mateus 5 : 38 – 48


Mateus 5 : 38 – 48
Patujolo:
Ala dipamalum Jesus na marsahit di ari sabat didok Parise do tu Tuhan Jesus sialo jala sirupakhon patik.  Alanii do didok Jesus tu nasida dijolo ni turpuk on: ro Ahu ndang na naeng mangarumpakhon patik alai pajongjonghon do. Marhite turpuk on diajari Jesus Parise dohot na umbege jamitaNa di Dolok taringot tu na mangulahon patik. Mangihuthon Jesus niradotan patik marhite namanghaholongi Debata dohot jolma. Ido impola ni patik, radot do nian Parise mangulahon patik alai ndang dihaholongi Debata dohot donganna. Radot do nasida pahothon patik alai ndada na pahothon holong ni roha, na pabalgabalga diri do dijolo ni jolma, dohot na naeng manggasipi, menjebak hagaleon ni na so mangulahon patik. Lupa nasida dipasahat patik i asa diboto nasida do manghaholongi Debata dohot dongan jolma. Hape ndang adong holong ni roha di Parise i, ai hosom do roha nasida tu na so mangulahon patik. Domu tusi do jamita ni Jesus di turpuk on. Dipodai Parise anggiat olo mamareso dirina taringot tu na mangulahon holong. Dipodahon tu nasida na mangaradoti patik i ima na manghaholongi Debata dohot donganna. Ndang sintong sada halak siradoti patik hape ndang dihaporseai Debata. Ndang sintong nihaholongan Debata hape nihosoman dongan.    

Hatorangan:
1.     Mamalos na jahat marhite na denggan
Dipatangkas Jesus di turpuk on taringot tu impola ni patik dohot dalan mangulahon patik. Dilehon Debata di Padan Narobi patik i asa jumpang pangoloion di bangso i, pangoloion tu Debata dohot pangoloion tu dongan jolma marhite na masihaholongan. Molo didok di Padan Narobi, "Mata abul ni mata, ipon abul ni ipon", asa masihaholongan do jolma i, unang adong na mambahen hansit ni roha ni donganna. Hape dipangke patik ""Mata abul ni mata, ipon abul ni ipon" tu pembalasan. Sasintongna dilehon patik i asa denggan do parsaorannasida jala mardamedame. Dibahen patik i asa jumpang di nasida ngolu na menghargai hak azasi ni donganna. Hape dipudian ni ari mago ma tujuan ni patik i, ai dipangke patik i gabe ojahan ni hukum pembalasan dohot masihosoman. Ndang be tu na masihaholongan diantusi nasida na nidok ni patik i, tu na membela diri  nama dohot tu kebebasan mambahen pembalasan tu sibahen na jahat.
Ala naung meret tujuan ni patik i sian rohanasida, alani ma diajari Jesus nasida mangulahon impola ni patik i, didok: "Unang alo hamu na jahat, molo adong na mamastap hurum siamunmi, tarehon ma nang hurummu sihambirang, molo adong na mambahen sindir tu ho, laho mambuat ulosmu, atena ma dohot bajumbajum di ibana, molo adong manang ise na manggogoi ho mandongani ibana sapaal, olio ma ibana dua" (ay. 39- 41).  Marhite turpuk on diajari hita manaluhon hajahaton  marhite pambahenan na denggan. Taluhonon hajahaton i marhite holong.

2.     Mangahoholongi dongan
      Diajari  Parise taringot tu hataridaan ni na mangulahon patik ima  marhite na manghaholongi dongan dohot musu. Manghaholongi dongan papataron marhite na mangurupi. Haradeon mangurupi dongan do tanda ni holong ni roha. Holong in ndada holan poda, slogan, doktrin alai papataron di pambahenan. I do na nidokna di ayat 42: "Lehon na mangido tu ho, unang tundali na naeng marsali tu ho". Ndang sintong nihaholongan dongan molo so niurupan. Holong ni roha in ndada holan patuduhon marhite tangiang. Na denggan do na manangianghon dongan na targogot dohot na pogos, jala parbue ni holong do i, alai dumenggan dope molo pinatuduhon parbue ni tangiang i dipambahenan, pangurupion (marhite ulaon diakonia).

3.     Manghaholongi musu
Marhite ayat 43-48, didok Jesus, ndang ringkot be nasida ajaranNa manghaholongi donganna, ai nunga bangko ni jolma na manghaholongi donganna. I do nidok no si Paulus di I Tessalonik 4:9: "Alai anggo haholongon ni roha di dongan ndang haru ringkot pasingothononku tu hamu, ai nunga diajari Debata hamu masihaholongan". Ndang holan siihuthon Kristus na manghaholongi donganna. Sijalo beo pe diula do i, na jahat pe dihaholongi do donganna. Nunga dipatikhon di Padan Narobi: "Holong ma roham di donganmi".  I do patik na leleng.
Nuaeng dilehon Jesus patik na imbaru, i ma manghaholongi musu. Manghaholongi musu ido hasurungan ni na mangihuthon Jesus sian na so porsea i. Tahaholongi musunta, ala Debata Ama i pe dos do pambahenanNa tu na jahat dohot tu na bonar, rap dilehon do udan tu parroha na tigor dohot tu parroha na geduk. Ingkon songon i do parange ni na manghaporseai Jesus.     


Panutup:
Na tarjou do halak Kristen gabe duta-duta perdamaian. Hilalaon ni portibi on dame na sian Jesus i molo tongtong dihangoluhon Kristen tangiang pardamean ni portibi sian si Fransiskus Van Asisi na mandok: "Tuhan, jadikanlah aku pembawa damai. Bila ada kebencian, jadikanlah aku pembawa cinta kasih. Bila ada hati yang terluka, jadikanlah aku pembawa pengampunan. Bila ada keputusasaan, jadikanlah aku pembawa harapan. Bila ada kegelapan, jadikanlah aku pembawa terang. Bila ada kesedihan, jadikanlah aku pembawa kegembiraan. Tuhan, semoga aku lebih ingin menghibur daripada dihibur, memahami daripada dipahami, mencintai daripada dicintai. Sebab dengan memberi aku menerima, dengan mengmpuni aku diampuni.  

Tidak ada komentar:

Poskan Komentar