Senin, 30 April 2012

2 Timoteus 1 : 6 – 12


                                                                          2 Timoteus 1 : 6 – 12                                                                                      

 Dijou, dipadiri, Didongani Jala Dipasupasu Debata asa Marpanindangi
(Terpanggil unguk Bersaksi)
Patujolo
Huria na mangolu i ma huria na marpanindangi (bersaksi). Ihut tu si, na targoar mate do huria molo dang diharingkothon na marpanindangi di ngoluna. Alai boi do bangkol huria marpanindangi, hinorhon ni angka lingkungan nang partingkian. Hira on ma na niigil ni turpuk on, asa Huria i tangkas marpanindangi, di ganup situasi. Secara historis, turpuk on sipaingot sian si Paulus do tu si Timoteus, na gabe Uluan ni Huria di haposoonna. Marhite i ringkot situtu hatorangan taringot tu pelayanan manang panindangion di si Timoteus di haposoonna i. Alai manghatai ma nuaeng turpuk on tu konteks na diperluas, i ma huria.
Adong dua pangantusion taringot tu huria. Huria secara fisik dohot huria non fisik. Huria fisik, i ma gedung gareja inganan parpunguan ni angka na porsea laho martangiang. Huria secara non fisik, i ma ruasna na dijou sian hagolapon tu hatiuron sian Debata. Huria secara non fisik on do na naeng panghulingan ni turpuk on, nunga tangkas nuaeng marpanindangi? Hombar tu ulaon panindangion i, na tarjou do luhut angka na porsea laho marpanindangi. Panjouon i adong dua; Panjouon secara umum (vocatio generalis) dohot panjouon secara khusus (vocatio spesialis). Tarjou do luhut halak na porsea secara umum tu hangoluan na pinatupa ni Debata di bagasan Jesus Kristus, laos patariparhon i di ngolu si ganup ari. Di I Petrus 2:9 Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i. Panjouon secara khusus, ganup do jolma dijou Debata marhite angka ulaonna be. Tarjou gabe pangula ni huria (hamalimon), tarjou do gabe partigatiga, PNS dna, na gabe dalan panindangion di hata ni Debata. Marhite i ma dipadiri Debata parhaladona laho patureturehon/memperlengkapi huria na tarjou secara khusus i asa tangkas marpanindangi. Di Efesus 4 : 11-12  “Laos Ibana do mangalehon deba gabe apostel, deba panurirang, deba evangelist, deba muse parmahan jala pangajari, patureturehon angka na badia i, laho mangulahon tohonan i, pauliulihon daging ni Kristus” Alani i hape, jamita ni angka parjamita/parhalado, dalan lao patureturehon ruas na tarjou secara khusus i do asa marjamita ganup di ulaonna be.

Hatorangan ni angka ayat
Ayat 6  : Dijalo jolma angka na porsea do pasupasu sian Debata, jala silehonlehon ni Debata do i. Ala ni i ingkon ringkot situtu parataratahon/mengkobarkan hata pasupasu silehonlehon i di ngolunta. Ia pasupasu i i ma huaso ni Tondi Porbadia na pinasahatna tu hita na laho patulushon ulaon haparhaladoon i di ngolunta. Tondi ni Debata dipasahat malim ma i marhite na mangampehon tangan di tingki na maghatindanghon hhaporseaon. Parhalado maksudna dison ndang na holan parhalado manang angka parjamita, alai luhut do angka halak na porsea gabe parhalado di ngoluna na mamaritahon Debata tu liat portibion.
Ayat 7 : Dilehon Debata do tondi hagogoon, haholongon dohot pangarajaion diri jala silehonlehon ni Debata na tolu on gabe modal utama laho patulushon ulaon panghobasionta di na marpanindangi. Na parjolo, tondi hagogoon na pahehehon dilehon do tu hita (1 Kor 2:4 ; Hatangku nang parjamitaonku pe, ndada marhata habisuhon na malo mangaithon; tondi dohot hagogoon di dipapatar disi. Na paduahon, dilehon Debata do holong ni rohaNa tu ganup na porsea di hataNa (Roma 5 : 5 Alai ndang na murak hita bahenon ni pangkirimon i, ala nunga diusehon tubagasan rohanta holong ni roha ni Debata marhitehite Tondi Parbadia, naung nilehonna i tu hita. Dilehon do muse tondi pangarajaion diri, i ma na adong habisuhon na tang (1 Tim 3 : 2 Dibahen i, unang ma adong dapot sisurahan di sintua: Harajaan ni sada boruboru ma ibana, marpangontik, marroha, marhapantunon, na las roha martamue, na malo mangajari).
Ayat 8; Debata do nampuna, manghophop laos patulushon barita na uli i. Alani i silehonlehon ni Debata di perlengkapan rohani na tolu i, habaranion, haholongon dohot pangarajaion diri, gabe modal utama laho marpanindangi. Antong unang ma gabe sumurut manang tahuton, nang pe sipata gabe pargasipan manang haotoon dietong halang hata ni Debata na tabaritahon. Dang tagamon so mandapot angka hamaolon hita mamaritahon barita na uli i tu na humaliang hita.
Ayat 9 : ia tung adong pe angka hamaolon na taadopi di na mamaritahon hata ni Debata (marpanindangi), alai adong do angka sangkap na uli sian Debata di ganup ngolunta. Di angka hamaolon i, dilehon Debata do haojahan (pegangan) tu si Timoteus/nang tu hita pe, i ma: Parjolo, Ojahan panjouon; Ibana do manjou hita marhite panjouon na badia. Panjouon i ndanda na marhaojahan tu pambahenanta na denggan di ngolunta, alai sangkap dohot asi roha ni Debata do di ngolu ni jolma. Marhite i, andorang so ditompa Debata dope portibi on, nunga dijou Debata hita tu haluaon (sian mula ni mulana).
Paduahon: Ojahan haluaon, Ibana do na paluahon hita sian dosa dohot hamatean marhite na tartullang Kristus di hau pinorsilang. Alaa ni i, paluaonna do ganup na targogot uju mamaritahon barita na uli i (uju marpanindangi di ngoluna).
Ayat 10 :  Dilehon do tu hita hangoluan na so ra suda, i ma haluaon na pinasahatNa andorang so ojak dope portibion. Ai nunga ditaluhon Jesus Kristus sorop ni hamatean ni jolma marhite hamateaanNa di hau pinorsilang. Laos haheheonNa gabe patumonaan ni haheheon ni luhut jolma, na gabe hangoluan na manontong. Alani i, marhite na pinaojakna hangoluan tu hita, marhapataran ma i di ngolu ni jolma na mangharinghothon ngolu na marpanindangi di ganup ulaonna be.
Ayat 11-12 Tarjou do ganup jolma di ulaonna be, laho marbarita na uli (marpanindangi). Ai ndada holan na parhalado marbarita na uli, alai luhutna jolma do. Di bagasan i, ndang so tagamon adong angka sitaonon; nang angka hamaolon. Alani i, so tung tapaila Debata, alai tongtong ma hita marsihohot, ai nunga dipabangkit hita.  Molo Ibana tahaporseai jala tapangasahon, jala pos rohanta na ramotanNa do hita mangaradoti na pinalumehonna (marbarita na uli) i tu hita, margogo ma hita mangadopi i saluhutna.

Usul siboanon tu Jamita
1.        Saluhutna angka na porsea di Debata, tarjou do mamaritahon hata ni Debata (manghatindanghonsa); kapan, dimana dan dalam situasi apapun; ai didok do di 1 Tim 4:2 Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion.
2.        Taparade ma ngolunta asa tangkas manghangoluhon hata ni Debata di ngolu on, ai ido hataridaan ni halak na mamaritahon barita na uli (marpanindangi). Molo pe tung ragat angka sitaonon nang hamaolon di ngolu on, tapatogu ma haporseaonta jala pos ni rohanta, ai Ibana do Manjou, manogu laos patulushon i saluhutna.
3.        Kristen na mangolu, i ma ngolu na marpanindangi (bersaksi). Sisada ihot do i di tugas panjouon na tolu i, koinonia, marturia, diakonia.
4.                panjouon do ganup ulaon ni angka na porsea. Tarjou gabe sintua, Pandita, Petani, Parlaut, Parboniaga, Parbetor, dna. Disulingkiti hata ni Debata ma hita, nunga tangkas panindangionta di ganup ulaonta i?? I do na marpanindangi. Ndang na ingkon marjamita i songon angka halak na pahattinghatting bibel tu angka loloan na torop songon di onan.                                                         Cal.Pdt. Harminto Sihombing, STh

Tidak ada komentar:

Poskan Komentar